Metár í íslenskri golfsögu! Gott ár í sögu Golfklúbbsins Odds. Þetta hljómar vel en þessu fylgir aukin ábyrgð og ný verkefni. Það gerði enginn ráð fyrr því að fjölgun í golfíþróttinni myndi verða svona hröð eins og raun ber vitni síðustu tvö ár. Tölur frá þjóðum í kringum okkur fram til 2020 sýndu að líklegi myndi iðkendafjöldi standa í stað næstu ár eða iðkendum fækka. Auðvitað er skýringin á fjölgun öllum ljós og það eina sem enginn veit er hvort sama þróun haldi áfram eða hversu stórt hlutfall af þeim sem bættust við hreyfinguna heldur sér í golfi um ókomna tíð.
Í þessari þróun eða fjölgun felast tækifæri. Við sjáum að hugmyndir okkar um stækkun Urriðavallar sem við höfum þegar kynnt gætu leyst að hluta okkar vanda og vanda golfhreyfingarinnar. Biðlisti hefur myndast í okkar golfklúbb og biðlisti er í dag í alla golfklúbba á höfuðborgarsvæðinu. Við þurfum að stækka innviði okkar eins og golfskála og miðað við þróun í átt að kröfu um heilsársaðstöðu sem er alltaf að verða háværari og háværari þá þurfum við að huga að því að byggja inniaðstöðu. Dagur kemur eftir þennan dag er spakmæli sem gott er að hafa í huga, framtíðin er óljós en við ætlum að vera bjartsýn á nýju ári, fylgja eftir okkar mikilvægasta málefni, stækkun Urriðavallar og halda áfram að láta þessa perlu okkar Urriðavöll blómstra í allri sinni mynd.